A CIG chama ao persoal civil de Defensa en Galiza a mobilizarse o 20 de maio en Ferrol e Marín por salarios dignos
A Confederación Intersindical Galega (CIG) vén de facer un novo chamamento ao persoal civil empregado no Ministerio de Defensa en Galiza para participar nas mobilizacións convocadas o mércores 20 de maio ás 11.00 horas en Ferrol e Marín, no marco das reivindicacións por unha mellora das condicións salariais e contra a discriminación retributiva dentro do propio departamento ministerial.
En Marín, a convocatoria consistirá nunha concentración diante da Escola Naval Militar, mentres que en Ferrol se celebrará unha manifestación que partirá ás 11.00 horas desde a porta do Parque do Arsenal. O percorrido continuará pola rúa da Igrexa até a porta do Dique, onde rematará cunha concentración. Esta modalidade de protesta foi escollida, segundo a organización sindical, para reforzar a visibilidade das demandas do colectivo ante as obras do proxecto “Abrir Ferrol ao mar”, que están a afectar ao espazo habitual das mobilizacións realizadas nos últimos meses.
A CIG subliña a importancia de que o persoal civil participe de maneira ampla nestas accións, xa que se achega unha fase determinante de cara ás próximas reunións das mesas de negociación, nas que se podería perfilar unha solución ao conflito derivado da desigualdade salarial entre traballadores dun mesmo ministerio. O sindicato reclama unha equiparación que se basee na mellora aplicada ao persoal funcionario militar, cun incremento de 2.800 euros brutos anuais, ao que se debería engadir a suba salarial do 4 % prevista para 2025 e 2026, e que debería quedar consolidada nos complementos correspondentes das relacións de postos de traballo.
Segundo denuncia a organización sindical, a orixe do conflito atópase na decisión do Ministerio de Defensa de incrementar as retribucións do persoal militar deixando fóra ao persoal civil, o que considera unha situación de discriminación interna no ámbito do emprego público.
Así mesmo, a CIG aproveita estas mobilizacións para cuestionar o incremento do gasto público en defensa por parte do Goberno do Estado, que cifra en arredor de 12.000 millóns de euros no último ano. O sindicato atribúe esta tendencia ás presións de organismos internacionais e advirte das consecuencias sociais dun modelo de aumento do gasto militar, que, ao seu xuízo, repercute negativamente no poder adquisitivo da clase traballadora debido ao incremento do custo da vida.
A organización sindical tamén sitúa estas reivindicacións no contexto do desfile das Forzas Armadas previsto para o 30 de maio en Vigo, que interpreta como parte dunha lóxica de exaltación do militarismo, mentres, segundo sostén, se poderían destinar eses recursos á mellora dos servizos públicos como a sanidade ou o ensino, ou á mellora das condicións salariais do persoal civil de Defensa.