Actualidade

Profesionais da Atención Primaria concentráronse en centros de saúde e PAC de toda Galicia para reclamar medidas estruturais e condicións laborais dignas.

A federación CIG-Saúde anunciou a convocatoria dunha folga na Atención Primaria para o vindeiro 12 de marzo ante o que cualifica como unha “situación límite” do sistema.

A decisión fíxose pública durante as concentracións celebradas este martes diante de numerosos centros de saúde e puntos de atención continuada (PAC) en distintas cidades e vilas de Galicia, nas que traballadores e traballadoras reclamaron medidas urxentes para garantir a calidade asistencial e condicións laborais dignas.

A secretaria nacional da CIG-Saúde, Ana Lestón, advertiu dun proceso de deterioro continuado marcado pola sobrecarga asistencial, a carencia de profesionais, a burocratización do traballo e a precariedade organizativa. Segundo denunciou, a resposta da Consellaría de Sanidade limítase á creación de novos grupos de traballo “sen medidas reais nin prazos de aplicación”.

Entre as reivindicacións do sindicato figuran a limitación das axendas asistenciais, a incorporación de máis persoal en todas as categorías profesionais, a eliminación da burocracia innecesaria, a definición de ratios adecuadas nas áreas administrativas e asistenciais, así como a planificación efectiva da atención continuada e dos PAC.

A CIG sostén que xa existen informes e conclusións técnicas elaboradas no seo do Consello Técnico de Atención Primaria que recollen propostas de mellora, e critica que estas non se estean a aplicar.

Coa convocatoria de folga, o sindicato fai un chamamento ao conxunto de profesionais e á cidadanía para mobilizarse en defensa dunha Atención Primaria pública, con recursos suficientes e condicións laborais dignas.