A CIG convoca unha xornada de loita o 15 de outubro contra o xenocidio en Palestina
A CIG fixo pública a convocatoria dunha xornada de paro xeral en Galiza para o 15 de outubro co obxectivo de reclamar o fin do xenocidio e da ocupación ilegal de Palestina, demandar a ruptura de toda relación diplomática, económica e militar co Estado de Israel e defender o dereito de autodeterminación do pobo palestino.
Baixo o lema “Tamén no traballo paremos o xenocidio”, a central chama a todo o persoal de centros de traballo públicos e privados a parar catro horas por quenda:
De 22:00 h do 14 de outubro a 02:00 h do día 15 (quenda de noite).
De 10:00 h a 14:00 h (quenda de mañá).
De 18:00 h a 22:00 h (quenda de tarde).
Ademais, a CIG anima a realizar concentracións diante dos centros de traballo pola mañá e mobilizacións nas vilas e cidades a partir das 19:30 h.
A central sindical lembra que leva dous anos de mobilizacións continuadas contra a masacre en Gaza, con máis de mil cen concentracións en todo o país, e acusa a outras organizacións de actuar agora sen manter unha coherencia real co traballo de apoio á causa palestina.
Así mesmo, a CIG chama a participar na manifestación convocada pola Coordinadora Galega de Solidariedade con Palestina o domingo 5 de outubro en Santiago, baixo o lema “2 anos de xenocidio e 77 anos de ocupación”.
Entre as reivindicacións principais da xornada figuran:
O cese inmediato do fogo e a retirada de tropas israelís.
A apertura de corredores humanitarios.
A investigación dos crimes contra a humanidade cometidos por Israel.
A ruptura das relacións diplomáticas e comerciais con Israel por parte da UE, o Goberno español e a Xunta.
A aplicación efectiva do dereito internacional, incluíndo o dereito de autodeterminación e de retorno.