Actualidade

A CIG-Administración Autonómica alerta da falta de planificación da Xunta ao comezo da campaña de alto risco, con carencias nas condicións laborais, estruturas de mando ineficaces e riscos crecientes para o persoal forestal.

A CIG-Autonómica denunciou que, un ano máis, a campaña de alto risco de incendios forestais comeza sen unha planificación axeitada por parte da Xunta. A central sindical alertou das deficiencias nas bases operativas, nas estruturas de mando e na xestión de persoal, o que aumenta o risco para os bombeiros e bombeiras forestais.

Desde a CIG destacan que os incendios forestais son cada vez máis perigosos, agravados pola eucaliptización, o cambio climático e o abandono do rural. Con todo, critican que a resposta da Xunta se centre en estruturas de mando complexas (UDEX, UTA, SEMOP) e no uso de tecnoloxía, esquecendo o coñecemento do territorio e a presenza humana.

Tamén denuncian a precarización do persoal, a falta de substitucións, o avellentamento da plantilla e a inexistencia de sistemas de xubilación anticipada ou segunda actividade. As brigadas de dous ou tres efectivos enfróntanse a lumes de gran magnitude sen recursos suficientes, o que compromete a seguridade laboral.

A organización sindical lembra que as casetas de vixilancia foron pechadas nun 50% e que moitas bases carecen de condicións mínimas, chegando a albergar a máis de 50 persoas en espazos reducidos e sen servizos adecuados. Ademais, critican a cobertura opaca de prazas, sen procesos selectivos nin formación, e a creación de unidades especiais con persoal elixido a dedo.

A CIG tamén cuestiona a eficacia da UME, pola súa operatividade limitada e maquinaria non adaptada á realidade galega, e rexeita a súa intervención en incendios ordinarios. Reclaman un sistema público de prevención baseado no coñecemento local, sen uso de herbicidas nin imposicións aos pequenos propietarios.

Finalmente, denuncian que a Xunta promove a eucaliptización e proxectos como o da macrocelulosa de Altri, contrarios á seguridade ambiental. Reclaman unha resposta coordinada, pública e eficaz para garantir a seguridade do persoal e da cidadanía fronte aos incendios forestais.