A CIG denuncia a súa expulsión da comisión do Fondo de Reserva
A CIG denuncia que foi excluída da comisión de seguimento do Fondo de Reserva da Seguridade Social, tras un cambio normativo que limita a representación sindical a organizacións de ámbito estatal. A central nacionalista sinala que se trata dunha “manobra escura e antidemocrática” do Goberno español para calar as voces críticas co sistema público de pensións.
A decisión, comunicada o 25 de marzo, supón que na vindeira reunión do 4 de abril só estarán presentes CCOO e UGT. A CIG lembra que participa na comisión desde 2006, tras unha sentenza do Tribunal Supremo que recoñecía a súa implantación como criterio válido. Agora, co novo Real Decreto 100/2025, só se recoñece a representatividade estatal.
Segundo a central, esta exclusión “premeditada” busca eliminar a presenza de organizacións como CIG ou ELA, críticas co funcionamento do sistema e coa xestión do Goberno. Denuncian ademais que a nova norma foi aprobada sen trámite de audiencia, incumprindo a lexislación vixente.
Desde a CIG denuncian que isto responde a un intento de silenciar denuncias como o incumprimento do SMI recollido na Carta Social Europea, a fraude nas horas extras non pagadas, a parcialización do emprego e o avance da privatización a través dos plans de pensións de emprego.
Advirten que seguirán asistindo como observadores, pero anuncian accións institucionais e legais para reverter a situación e defender o dereito da clase traballadora galega a ter voz.