A CIG denuncia falta de persoal e reclama medidas ante un brote de sarna na residencia DomusVi Monforte
A CIG-Unión Local de Monforte denuncia a situación que se estaría a producir na residencia de maiores DomusVi Monforte, onde, segundo a información que manexa a organización sindical, non se estaría cumprindo o ratio de persoal necesario para garantir unha atención adecuada ás persoas residentes.
O sindicato asegura que a falta de efectivos está a provocar unha importante sobrecarga de traballo para a plantilla, con consecuencias tanto nas condicións laborais como na calidade e seguridade da atención ás persoas usuarias.
A CIG alerta ademais de que hai máis de dous meses se produciu un brote de sarna no centro que, segundo os datos dos que dispón, afectou polo menos cinco traballadoras. A organización sindical non descarta que o número de persoas afectadas poida ser superior.
O sindicato manifesta tamén a súa preocupación por descoñecer se algunha das persoas usuarias da residencia puido resultar afectada ou estar exposta ao contaxio, así como pola situación actual respecto destas persoas.
Segundo a información facilitada pola CIG, a día de hoxe non se tería activado de maneira efectiva o “Protocolo de actuación ante a sarna humana en institucións con coidadores”, nin se terían adoptado todas as medidas preventivas e de control necesarias para evitar novos contaxios.
Para a organización sindical, esta situación resulta especialmente preocupante nunha residencia de maiores polas características das persoas residentes e pola necesidade de aplicar de maneira rigorosa os protocolos establecidos para a prevención, o control e o tratamento da sarna en institucións con coidadores.
A CIG reclama á dirección de DomusVi que adopte de inmediato as medidas necesarias para garantir unha dotación suficiente de persoal e o cumprimento dos ratios correspondentes, evitando que a falta de efectivos se traduza nunha sobrecarga permanente para as traballadoras e traballadores.
Do mesmo xeito, o sindicato esixe información sobre a situación actual do brote, as medidas adoptadas desde a súa detección e as indicacións recibidas por parte das autoridades sanitarias.
A organización sindical reclama tamén que se active e aplique de maneira efectiva o “Protocolo de actuación ante a sarna humana en institucións con coidadores”, no caso de que aínda non se fixera.
A CIG considera que a saúde e a seguridade das persoas residentes e do persoal non poden quedar en segundo plano e reclama á empresa unha actuación inmediata para garantir a protección das persoas usuarias e das traballadoras e traballadores do centro.