A CIG denuncia que o Goberno español incumpre a conciliación e prioriza a propaganda
A CIG volve criticar ao Goberno español por incumprir a transposición da directiva europea 2019/1158 sobre a conciliación da vida familiar e laboral. Segundo a central sindical, o Executivo estatal continúa empregando a propaganda como estratexia para agochar o atraso na garantía efectiva dos dereitos laborais, especialmente no tocante ao permiso parental.
Margarida Corral, secretaria confederal das Mulleres da CIG, denunciou que o recente acordo aprobado polo Consello de Ministros non resolve os incumprimentos. A nova norma mantén sen retribuír o permiso parental e non modifica o artigo 48 bis do Estatuto dos Traballadores, obrigando a acudir á vía xudicial para reclamar dereitos recoñecidos pola UE.
A CIG tamén sinala a discriminación que sofren as familias monoparentais e numerosas, que non reciben a mesma cobertura que outras tipoloxías familiares. Ademais, lamentan que o Goberno non avance na equiparación do permiso por nacemento ata as 20 semanas nin amplíe dereitos no caso de adopción ou acollemento.
A central insiste en que o coidado segue recaendo de forma desproporcionada nas mulleres, e que as administracións públicas seguen sen garantir mecanismos de apoio suficientes. Tamén reclaman a actualización da Lei de prevención de riscos laborais desde unha perspectiva de xénero.
Para a CIG, a falta de avances reais mostra que, malia prometer políticas progresistas, o Executivo español segue sen cumprir os compromisos programáticos en materia de igualdade e conciliación.