A CIG denuncia que o PLADIGA 2026 mantén conxelado o persoal e aumenta a externalización
A CIG-Administración Autonómica denunciou que o PLADIGA 2026 mantén conxelado o persoal propio da Xunta no Servizo de Prevención de Incendios Forestais (SPIF) e afonda na externalización do operativo de alto risco.
Segundo a central sindical, o novo plan non incorpora ningunha praza adicional de persoal propio para a extinción de lumes, mantendo os mesmos efectivos que en 2025, con 276 brigadas terrestres e 12 helitransportadas. Ademais, critican que a Administración non convocou ás organizacións sindicais para negociar as condicións de traballo.
A CIG sinala que tampouco se reforzan perfís técnicos nin operativos, como bombeiros forestais, persoal de vixilancia, axentes de investigación ou dirección técnica, agás a creación de 15 postos de axentes UDEX. En total, o operativo contará con 3.069 traballadoras e traballadores durante o período de alto risco.
O sindicato subliña que o único incremento anunciado chega a través da contratación externa, con 42 brigadas de terra adicionais, o que supón 168 bombeiros forestais. Porén, advirte de que este reforzo non pertence ao persoal propio da Xunta, senón que se realizará a través de empresas públicas ou participadas, como TRAGSA.
En relación cos medios aéreos, o PLADIGA 2026 introduce cambios puntuais, como o aumento de avións de carga en terra ou a incorporación dun helicóptero pesado, pero sen supoñer, segundo a CIG, un reforzo estrutural do operativo, que segue dependendo en boa medida de servizos privatizados.
A central sindical tamén critica a ampliación do modelo de convenios cos concellos, que pasa de 184 a 190 brigadas municipais. Considera que este sistema xera descoordinación e atrasos, xa que traslada ás administracións locais a responsabilidade de contratar, formar e equipar ao persoal, o que fai que moitos equipos non estean plenamente operativos ata ben entrado o verán.
Neste sentido, advirten de que este modelo favorece a incorporación de persoal sen a suficiente experiencia para tarefas de alto risco, nun contexto marcado por incendios cada vez máis intensos debido ao cambio climático.
A CIG tamén denuncia que o plan non incorpora unha análise dos accidentes graves rexistrados durante a campaña de 2025, nin medidas correctoras para evitalos no futuro.
Por outra banda, critica o uso de denominacións como “peón” ou “xefe de brigada” para persoal que realiza funcións propias de bombeiros forestais, o que, segundo indican, supón un retroceso no recoñecemento profesional e pode afectar a dereitos laborais como a xubilación anticipada ou a protección en materia de saúde.
En conclusión, a organización sindical considera que o PLADIGA 2026 mantén un modelo “fracasado”, baseado na externalización e na fragmentación, e reitera a necesidade dun servizo de incendios forestais 100% público, profesionalizado e con condicións laborais iguais para todo o persoal.