A CIG-Ensino anuncia dúas novas xornadas de folga o 28 e 29 de outubro se a Xunta non abre unha negociación real
A CIG-Ensino, primeira forza sindical no ensino público galego, anunciou a convocatoria de dúas novas xornadas de folga os días 28 e 29 de outubro, despois do éxito da mobilización e da folga do pasado 25 de setembro, ante o que consideran inacción e inmobilismo da Xunta de Galicia.
O sindicato remitíulle un escrito ao conselleiro de Educación no que o empraza a abrir unha negociación real que atenda as principais demandas do profesorado galego. En caso contrario, advirten, intensificaranse as mobilizacións.
As novas protestas foron consensuadas co STEG, e nos próximos días continuarán as asembleas informativas nos centros educativos para animar o profesorado a implicarse activamente.
Entre as reivindicacións principais, a CIG-Ensino reclama:
Baixada de ratios en todas as etapas educativas a partir do curso 2026/27.
Recuperación do horario lectivo recortado en 2011 e 2012, con 21 horas en Infantil e Primaria e 18 no resto de ensinanzas.
Medidas reais para atender a diversidade, con máis persoal especialista de PT e AL, máis orientadores e autorización de desdobres e programas de atención específica.
Plan de eliminación da burocracia, con máis tempo para equipos directivos e titorías.
Melloras retributivas, incluíndo un incremento lineal no complemento autonómico, cobro do verán para substitutos con máis de 5 meses e medio de servizo e equiparación salarial do profesorado de FP.
Redución da xornada laboral a partir dos 55 anos e recuperación das licenzas por formación retribuídas.
A organización sindical esixe que estas melloras se plasmen nos orzamentos da Xunta para 2026, que se debaterán en decembro, e chama ao resto de sindicatos —especialmente aos asinantes do Acordo de Melloras— a sumarse á mobilización.
A CIG-Ensino lembra que os poucos avances logrados pola Consellaría, como a cobertura máis rápida de vacantes, a adxudicación de prazas do programa PROA+ ou o adianto no pagamento de nóminas ao persoal substituto, foron consecuencia directa da presión do profesorado e das familias.
Para o sindicato, isto demostra que a mobilización é o único camiño para conseguir cambios reais na política educativa da Xunta e reverter anos de recortes e precarización no ensino público galego.