A CIG-Ensino chama a secundar a folga do 25 de setembro en defensa dos dereitos do profesorado
A CIG-Ensino ten convocada unha folga xeral no ensino público non universitario para este xoves 25 de setembro en rexeitamento das políticas de recortes e propaganda da Xunta de Galicia. A convocatoria reclama a recuperación dos dereitos perdidos desde 2011 e 2012, cando se ampliaron os horarios lectivos ata as 25 horas en Infantil e Primaria e a 18 no resto das ensinanzas.
Entre as principais demandas están a redución de ratios en todas as etapas, o incremento de persoal para atender a diversidade, a eliminación da burocracia innecesaria e o recoñecemento salarial e profesional do traballo docente. A central tamén denuncia censuras e imposicións da Consellaría, esixindo poder traballar en liberdade.
Xunto ao paro laboral, a CIG-Ensino convocou unha manifestación que partirá ás 12h da Praza de Cervantes en Santiago cara á Consellaría de Educación, onde se lerá un manifesto. O lema da mobilización será “Recuperar e Avanzar en Dereitos. Ensino público galego con futuro”.
O sindicato lembra que o curso arrancou con incidencias en todas as etapas educativas: falta de profesorado e especialistas en Infantil e Primaria, ratios elevadas e sobrecarga en Secundaria e Bacharelato, e un inicio caótico en FP pola implantación da reforma. Tamén denuncian a precarización do persoal substituto polas medias xornadas e unha carga burocrática cada vez maior.
A central insiste en que “é hora de visibilizar conxuntamente todos os conflitos que se dan de forma atomizada nos centros” e aposta pola unidade de acción fronte á división. “Coa forza de todos e todas pódese recuperar o horario, reducir ratios, eliminar burocracia, aumentar o persoal, cobrar dignamente e traballar en liberdade. É unha cuestión de dereitos e de dignidade”, sinala a executiva federal da CIG-Ensino.