A CIG-Ensino denuncia que o aumento de profesorado para o próximo curso queda moi lonxe do anunciado pola Xunta
A CIG-Ensino asegurou que a adxudicación provisional de destinos para o curso 2026/27 evidencia que o reforzo de persoal prometido pola Xunta está moi por debaixo das cifras anunciadas. Segundo o sindicato, a comparativa coa adxudicación definitiva do pasado curso revela un incremento de só 396 docentes, moi lonxe dos 900 profesionais adicionais comprometidos polo Goberno galego.
A central sindical sostén que a redución da xornada lectiva a 18 horas apenas suporá a incorporación dun docente máis de media por cada un dos 404 centros de Secundaria, Formación Profesional e ensinanzas de réxime especial, o que considera insuficiente para cubrir as necesidades derivadas da nova organización.
Entre os datos que destaca figura a diminución de 125 vacantes na especialidade de Educación Primaria respecto ao curso anterior, mentres que en Secundaria, lonxe das 100 prazas de Pedagoxía Terapéutica prometidas, a adxudicación provisional recolle cinco vacantes menos ca o pasado curso. No caso da Orientación, o incremento queda en 42 profesionais, por debaixo das 50 prazas anunciadas.
A CIG-Ensino considera que esta situación dificultará a organización dos centros educativos e advirte de que pode traducirse nunha redución da oferta de materias optativas, así como de desdobres e medidas de reforzo ao alumnado.
O sindicato tamén critica que a atención á diversidade non se vexa reforzada, xa que as prazas de Orientación en Infantil e Primaria permanecen sen cambios e o aumento de especialistas en Pedagoxía Terapéutica e Audición e Linguaxe resulta moi limitado.
Ademais, denuncia que o incremento nalgunhas especialidades responde ao elevado número de prazas que quedaron sen cubrir nas últimas oposicións e alerta dunha redución do profesorado en Formación Profesional, conservatorios de música e do colectivo de profesorado especialista.
Ante esta situación, a CIG-Ensino reclama á Consellaría de Educación que rectifique antes da adxudicación definitiva de destinos, prevista para o 3 de agosto, e complete as dotacións comprometidas para garantir unha resposta axeitada ás necesidades dos centros educativos.