A CIG-Ensino esixe negociar co profesorado e acusa á Consellaría de excluír o sindicato maioritario
Delegadas sindicais concentráronse esta mañá diante da Consellaría de Educación, en San Caetano, para denunciar a falta de negociación coa Administración e reclamar a convocatoria inmediata da Mesa Sectorial. A protesta serviu tamén para lembrar que levan desde setembro solicitando a apertura dun diálogo formal, mentres acusan ao departamento autonómico de excluír deliberadamente ao sindicato maioritario nas reunións con outras organizacións, algunhas delas sen representación na propia Mesa.
A secretaria nacional da CIG-Ensino, Laura Arroxo, criticou que a Consellaría estea a presentar como “pechado” un suposto acordo ante as direccións dos centros educativos sen ter sido negociado previamente. Segundo indicou, esta mesma semana a Dirección Territorial de Lugo trasladará o contido do documento aos equipos directivos, o que, ao seu xuízo, evidencia que levar o asunto á Mesa Sectorial sería “un mero trámite sen capacidade real de negociación”.
Arroxo contrapuxo esta actitude coa doutras áreas da Xunta, como Sanidade, onde —segundo destacou— si se mantén interlocución co sindicato maioritario tanto na Mesa Sectorial como no comité de folga. Neste contexto, cualificou de “impropio” que o presidente da Xunta non respecte a representación sindical e lembrou que esta conta coa mesma lexitimidade que a institucional.
A seis semanas do remate do curso académico, e tras seis xornadas de folga e múltiples mobilizacións, a responsable sindical denunciou que non existen avances concretos que permitan prever melloras no ensino público galego a partir do próximo curso. “Non hai nin sequera un borrador das medidas anunciadas”, advertiu, ao tempo que atribuíu os escasos movementos da Administración á presión exercida pola comunidade educativa.
Entre as reivindicacións, destacou a necesidade de incrementar o persoal para atender á diversidade e actualizar os catálogos de postos de traballo en infantil e primaria, medidas que —lembrou— xa foran propostas pola CIG-Ensino meses atrás e rexeitadas entón pola Consellaría.
Tamén puxo o foco na recuperación horaria do profesorado de secundaria e doutras ensinanzas, advertindo de que esta só será viable cun aumento significativo do cadro de persoal. Neste sentido, cuestionou a ausencia de previsións orzamentarias que avalen as medidas anunciadas, ao considerar que “todo acordo require financiamento” e que, polo momento, non existen cifras concretas.
Arroxo asegurou que o profesorado está “canso de promesas” e advertiu de que a resposta do colectivo continuará sendo contundente. Así, chamou a participar nas mobilizacións convocadas para esta tarde en distintos puntos de Galicia, nas que tamén estarán presentes asociacións de nais e pais, alumnado e outros colectivos.
Finalmente, instou á Consellaría a convocar de inmediato a Mesa Sectorial e a abrir unha negociación real, advertindo de que a paciencia do profesorado “está a esgotarse” e que o sector demanda solucións concretas para un ensino público que considera cada vez máis deteriorado.