Actualidade

A CIG presentou a súa proposta de protocolo marco para previr a violencia laboral no Servizo de Axuda no Fogar e convocou unha folga o 13 de agosto para reclamar dignificación e seguridade para as traballadoras.

A Confederación Intersindical Galega (CIG) presentou este luns en Santiago a súa proposta de Protocolo de actuación ante situacións de violencia no traballo no Servizo de Axuda no Fogar (SAF), reclamando a súa negociación urxente coa Xunta, concellos e patronal. O sindicato convoca, ademais, unha folga o 13 de agosto para esixir medidas reais que garantan a seguridade e dignifiquen as condicións laborais das traballadoras deste servizo esencial.

O secretario xeral, Paulo Carril, denunciou a ausencia de resposta institucional tras o recente asasinato dunha traballadora do SAF en Porriño, lembrando que a CIG leva máis dunha década pedindo un protocolo que prevexa riscos de agresión nos domicilios e nos desprazamentos. Criticou o modelo privatizado e mercantilizado do servizo, reclamando un sistema público galego de atención ás persoas.

A proposta de protocolo marco inclúe medidas preventivas —como avaliación inicial de riscos, rexistro centralizado de incidencias e posibilidade de suspender o servizo ante risco grave— e reactivas, como un dispositivo de alerta tipo botón de emerxencia e atención sanitaria inmediata en caso de agresión. Tamén recolle a xustificación e remuneración das ausencias laborais derivadas destas situacións.