A CIG-Industria faise coa totalidade da representación sindical en Otis Mobility Vigo

A federación de Industria da CIG conseguiu a totalidade da representación sindical na empresa Otis Mobility en Vigo, tras obter os tres delegados de persoal nas eleccións sindicais celebradas o pasado martes.
Os tres candidatos da central sumaron 81 votos (31, 25 e 25, respectivamente), fronte aos 13 votos obtidos polo único candidato presentado polo Sindicato de Elevación, organización que no anterior proceso lograra os tres representantes.
Dende a CIG-Industria agradeceron a confianza da plantilla e manifestaron a súa intención de traballar nos vindeiros anos para mellorar as condicións laborais, co obxectivo de impulsar unha revisión do convenio de empresa a nivel estatal.
A compañía Otis Mobility, dedicada á fabricación, mantemento e instalación de equipos de elevación, conta con 45 traballadores no seu centro de Vigo.