A CIG-Saúde denuncia a saturación das Urxencias do CHUAC e reclama reabrir máis de 130 camas pechadas
A CIG-Saúde da Coruña advertiu da situación de saturación que atravesa o servizo de Urxencias do Hospital Universitario da Coruña (CHUAC), unha problemática que atribúe á falta de planificación da Xerencia durante o período estival e á insuficiencia de recursos dispoñibles.
Segundo explica a organización sindical, a elevada presión asistencial obrigou a habilitar catro corredores adicionais para atender pacientes, unha medida que, ao seu xuízo, evidencia o colapso do servizo e repercute tanto na atención prestada á cidadanía como nas condicións laborais do persoal sanitario.
A CIG-Saúde sostén que esta situación non responde a un incremento inesperado da demanda asistencial, senón á ausencia de previsión. A secretaria da CIG-Saúde da Coruña, Isabel Golpe, asegura que “A Atención Primaria funciona baixo mínimos pola falta de cobertura de vacacións, reducindo a súa capacidade, polo que a poboación vese obrigada a acudir ás Urxencias”.
O sindicato tamén sinala que o CHUAC mantén pechadas máis de 130 camas de hospitalización, unha circunstancia que, segundo denuncia, dificulta os ingresos e obriga moitas persoas pacientes a permanecer durante horas, e mesmo días, no servizo de Urxencias, incrementando aínda máis a saturación existente.
Desde a organización consideran “inaceptable” que esta situación se repita cada verán e atribúena a decisións orientadas ao aforro que, segundo indican, repercuten negativamente tanto na cidadanía como no persoal sanitario.
Ante este escenario, a CIG-Saúde reclama á Xerencia da Área Sanitaria da Coruña e Cee a apertura inmediata das máis de 130 camas actualmente pechadas, a cobertura das vacacións do persoal e un reforzo dos recursos asistenciais. O sindicato conclúe que “A sanidade pública non pode seguir funcionando ao límite. A cidadanía merece unha atención digna e o persoal condicións de traballo seguras”.