A Deputación de Lugo e as Confrarías de Pescadores reforzan a colaboración cun convenio de 24.000 euros
O presidente da Deputación de Lugo, José Tomé Roca, e o presidente da Federación Provincial de Confrarías de Pescadores, José Basilio Otero Rodríguez, asinaron este xoves no Pazo de San Marcos un convenio de colaboración polo que a institución provincial destinará 24.000 euros á entidade. O obxectivo é apoiar o seu funcionamento e poñer en marcha unha nova campaña de divulgación sobre a pesca na Mariña lucense.
Segundo explicaron, a iniciativa busca poñer en valor as tradicións mariñeiras e concienciar á cidadanía sobre aspectos vencellados ao mar, ás distintas especies e ás artes de pesca. A campaña, que segue a liña da realizada o ano pasado, inclúe carteis, folletos e pezas audiovisuais, ademais de visitas guiadas a portos para alumnado de institutos da comarca e doutros puntos da provincia, unha actividade que está a rexistrar unha excelente acollida.
José Tomé subliñou que esta achega “é unha mostra clara do compromiso da Deputación co sector pesqueiro”, ao tempo que destacou o labor da Federación, “fundamental para que as embarcacións de altura, gran altura, litoral e baixura poidan desenvolver o seu traballo e traer a porto un produto de primeira calidade, que é sinal de identidade da nosa provincia”.
A Federación Provincial de Confrarías de Pescadores de Lugo agrupa todas as confrarías existentes na provincia, situadas en Ribadeo, Foz, Burela, San Cibrao, Celeiro e O Vicedo.