A Deputación de Pontevedra conmemora o Día Mundial das ONG cunha nova edición das axudas para cooperación ao desenvolvemento

A institución destina 45.000 euros para financiar proxectos en países empobrecidos a través das ONGD da provincia. O prazo de solicitudes abrirase o 19 de marzo.
Dia Mundial Ong
28 Feb 2025

A Deputación de Pontevedra conmemora o Día Mundial das ONG coa posta en marcha dunha nova convocatoria de axudas de cooperación ao desenvolvemento. Cun orzamento de 45.000 euros, esta liña de achegas permitirá financiar proxectos en países empobrecidos e reafirma o compromiso da Deputación coa defensa dos dereitos humanos en todo o mundo.

O ano pasado, esta iniciativa permitiu apoiar proxectos desenvolvidos en Honduras e O Salvador a través de entidades como a Asociación Amigos da Terra, a Asemblea de Cooperación pola Paz e Solidariedade Internacional de Galicia. Para esta nova convocatoria, prevese financiar ata tres proxectos con ata 15.000 euros cada un, sempre que estean aliñados coa Axenda 2030 e enfoquen a súa acción na erradicación da pobreza, a igualdade de xénero, a sostibilidade ambiental ou a defensa dos dereitos humanos.

Terán prioridade aqueles proxectos que se desenvolvan en once países estratéxicos:

  • África Subsahariana: Cabo Verde, Guinea-Bissau e Mozambique.
  • América Central: Guatemala, Honduras, Nicaragua e O Salvador.
  • América do Sur: Bolivia, Ecuador e Perú.
  • Caribe: República Dominicana.

Tamén se valorarán proxectos en países con crises humanitarias ou que precisen apoio para poboacións refuxiadas e desprazadas.

Poderán optar a estas axudas as ONGD inscritas no Rexistro de Axentes de Cooperación para o Desenvolvemento da Xunta de Galicia, que teñan sede ou delegación permanente na provincia de Pontevedra. As bases publicaranse no Boletín Oficial da Provincia de Pontevedra (BOPPO) o 18 de marzo e as entidades interesadas poderán presentar as súas solicitudes desde o 19 de marzo durante un mes.

⚙ Configurar cookies
0.10100293159485