A Deputación destina máis de 800.000 € para 66 contratacións en cinco concellos da provincia
A Deputación de Pontevedra aprobou a concesión de máis de 800.000 euros para apoiar a contratación de 66 persoas en cinco concellos da provincia no marco do Plan +Provincia 2026-2027.
O presidente provincial, Luis López, informou do visto bo a estas novas achegas, destinadas aos concellos de Tui, Cuntis, O Grove, Baiona e Moaña, co obxectivo de reforzar os servizos municipais mediante a incorporación de persoal temporal de diferentes perfís.
En concreto, Tui recibirá 93.000 euros para a creación de 6 postos de traballo, entre os que se inclúen un operario soldador/cerralleiro, un enxeñeiro técnico forestal, dous peóns de horticultura e xardinería e dous operarios de limpeza.
Pola súa banda, Cuntis contará con 106.000 euros para 9 contratacións, que abranguen operarios de parques e xardíns, albaneis, peóns albaneis, un condutor de camión e persoal de recollida de residuos.
O Grove recibirá 179.000 euros para impulsar 17 contratacións, incluíndo condutores de camión, operarios, persoal de xardinería, limpeza e animación sociocultural.
Tamén Baiona será beneficiaria de 206.000 euros para a creación de 14 postos de traballo, destinados principalmente a obra pública, limpeza viaria e servizos culturais.
Finalmente, Moaña contará con 219.000 euros para a contratación de 20 persoas en perfís relacionados coa construción, electricidade, limpeza e mantemento ambiental.
Luis López destacou que estas achegas forman parte dos 85 millóns de euros cos que está dotado o Plan +Provincia 2026-2027, que definiu como “o plan de obras e servizos de competencia municipal máis ambicioso da historia da Deputación de Pontevedra”.