A Deputación leva a Vigo o ciclo Artes Vivas da Bienal coa performance “SSSSS” de Marc Vives
O ciclo de Artes Vivas da Bienal de Pontevedra chega a Vigo este venres 29 de agosto cunha proposta singular: a estrea en Galicia da performance “SSSSS” de Marc Vives. A cita será ás 20:00 horas no Museo do Mar de Galicia, con entrada libre ata completar aforo.
Comisariado por Iñaki Martínez Antelo, o ciclo Artes Vivas ten a súa base en Pontevedra pero expándese por diferentes puntos da provincia, transformando espazos urbanos, patrimoniais e industriais en escenarios efémeros abertos ao público. O obxectivo é conectar a creación contemporánea co territorio e os seus habitantes, favorecendo novos encontros e experiencias culturais.
Marc Vives (Barcelona, 1978) é un artista que traballa entre as artes escénicas e visuais, centrado na materialidade da voz e o seu potencial escultórico para infiltrarse en arquitecturas, paisaxes e corpos. En 2018 iniciou unha rutina de nadar desde a praia da Barceloneta ata Montjuïc, un xesto que derivou nun conxunto de obras performativas, audiovisuais e gráficas.
A súa peza “SSSSS” —cuxo título fai referencia ás iniciais de area, mar, sol, sexo e sangría en inglés— xorde dun vídeo no que o artista nada pola Costa Brava cunha cámara suxeita á cabeza, xerando unha visión fragmentada e inquietante dunha paisaxe costeira entre o salvaxe e o construído.
Na performance, Vives desenvolve exercicios de voz que recrean esa experiencia de “cantarlle” á paisaxe desde o mar. Segundo explica, o propósito é atraer esa calidade líquida ás estruturas que nos rodean, repolitizalas en clave relacional e provocar un cambio de percepción sobre a perda de equilibrio e seguridade asociada á terra firme.