A Deputación pecha o 9 de abril o prazo das axudas culturais de 350.000 € para entidades da provincia
A Deputación de Pontevedra ultima o prazo para que as entidades sen fins de lucro da provincia soliciten as axudas destinadas á realización de actividades culturais durante o ano 2026, que permanecerá aberto ata o vindeiro 9 de abril.
A convocatoria está dotada de 350.000 euros, o que supón un incremento de 50.000 euros respecto ao exercicio anterior. As bases poden consultarse no Boletín Oficial da Provincia.
Estas axudas divídense en dúas liñas diferenciadas. A primeira, cun orzamento de 290.000 euros, permitirá financiar actividades de posta en valor do patrimonio inmaterial da provincia, así como certames e iniciativas relacionadas coa pintura, escultura, arquitectura e banda deseñada. Tamén inclúe festivais, mostras, encontros culturais e actividades de promoción da cultura e das tradicións galegas, tanto dentro como fóra de Galicia.
A segunda liña, dotada con 60.000 euros, está destinada á participación de entidades en festivais, concursos ou intercambios culturais de ámbito nacional e internacional.
Cada entidade poderá recibir unha achega máxima de 2.500 euros, sempre que non supere o 75% do orzamento total da actividade presentada.
A Deputación busca con esta convocatoria fomentar a cultura galega nas súas múltiples expresións, contribuíndo á promoción do patrimonio, á dinamización cultural —especialmente nas zonas menos poboadas— e á difusión das tradicións da provincia.
Na edición anterior, máis de 200 colectivos resultaron beneficiarios destas axudas.