Emprego

O plan inclúe un reforzo en intelixencia artificial, competencias dixitais, igualdade e idiomas, cun incremento do 25 % na formación de linguaxe administrativa e xurídica galega

A Escola Galega de Administración Pública (EGAP) presentou no Parlamento de Galicia o seu Plan de Formación para 2026, un programa que contempla a convocatoria de 811 actividades formativas cunha oferta próxima ás 45.600 prazas. Estas accións van dirixidas ao persoal da Administración autonómica, da Administración de xustiza, das entidades locais galegas, das entidades públicas instrumentais e da Administración institucional, así como ao persoal técnico, de xestión e de administración e servizos das universidades do Sistema Universitario de Galicia.

Entre as novidades deste plan destaca o reforzo das actividades formativas relacionadas co réxime xurídico, con especial atención á intelixencia artificial e ás actuacións administrativas automatizadas. Tamén se amplía o número de prazas nas accións orientadas a que o persoal empregado público obteña a certificación galega de competencias dixitais.

O programa consolida ademais a súa aposta formativa en materia de igualdade e de prevención e loita contra a violencia de xénero, incorporando novos contidos sobre a prevención da violencia machista a través dos servizos de axuda no fogar, a conciliación e a corresponsabilidade, e a diversidade sexual, corporal ou de xénero. A isto súmase a formación continua impulsada polo Instituto de Economía Pública de Galicia, que inclúe novos títulos sobre contabilidade pública autonómica, intelixencia artificial aplicada a procedementos tributarios e intervención administrativa en sectores regulados.

En canto aos idiomas estranxeiros, o plan de 2026 ofrece formación por niveis en inglés, francés, alemán, italiano e portugués, ademais de dous niveis de lingua de signos e diferentes actividades centradas en reforzar as habilidades orais e o manexo de idiomas na atención á cidadanía.

A formación en linguaxe administrativa e xurídica galega tamén experimenta un notable impulso, cun incremento do 25 % con respecto ao ano anterior, o que supón máis de 3.700 horas de formación orientadas a mellorar as competencias no uso de ambas as vertentes técnicas do idioma galego.

O plan combina distintas modalidades de impartición —teleformación, telepresenza, autoformación e docencia presencial— cun reforzo das fórmulas apoiadas en medios telemáticos.

Durante a segunda metade do ano, a EGAP manterá tamén a súa oferta de actividades divulgativas e de especialización, que inclúe cursos superiores, cursos monográficos, xornadas, webinarios e conferencias centrados na actualización de coñecementos e na análise de cuestións de relevancia para as administracións públicas e o emprego público.

Segundo se sinalou durante a presentación, o plan de 2026 concíbese como unha ferramenta para a mellora e modernización das administracións da Comunidade Autónoma, co fin de que o persoal poida responder de forma satisfactoria ás demandas cambiantes da sociedade e anticiparse aos retos que afrontan as administracións nun contexto marcado polo cambio constante e a incerteza, co obxectivo último de prestar o mellor servizo posible á cidadanía.