Cultura

Pontevedra énchese de vida medieval os días 5 e 6 de setembro coa XXIV edición da Feira Franca, unha das festas de recreación histórica máis importantes de Galicia, cun programa cheo de torneos, pasarrúas, xogos infantís e mercados.

A Boa Vila prepárase para vivir unha nova edición da Feira Franca, declarada Festa de Interese Turístico e convertida xa nunha cita imprescindible no calendario galego. O evento, que terá lugar os días venres 5 e sábado 6 de setembro, mergullará á cidade nun auténtico escenario medieval no que veciños e visitantes serán protagonistas.

A programación comezará o venres 5 ás 19.00 horas cos pregoeiros a cabalo anunciando o inicio da XXIV edición polas rúas do centro histórico. Xa pola noite, ás 22.00 horas, terá lugar o espectáculo inaugural “As Meigas”, da compañía Pablo Méndez Performance, na Ferraría.

O sábado 6, Día Grande da Feira Franca, abrirase ás 11.30 horas o mercado medieval na avenida de Santa María e as mostras de oficios tradicionais nas prazas da Ferraría, Pedreira e O Peirao. A xornada incluirá recreacións históricas, música polas rúas, demostracións de esgrima, tiro con arco, torneos medievais na praza de touros e múltiples propostas para todos os públicos.

Non faltarán tampouco os xogos para nenas e nenos, os obradoiros creativos, a mostra de embarcacións tradicionais no Lérez e os mercados de alimentación e artesanía. Ademais, as rúas e prazas da cidade engalánanse con bandeirolas, escudos e decoración medieval, mentres milleiros de persoas participan caracterizadas coas súas vestimentas históricas.

A Feira Franca ten a súa orixe nun privilexio concedido en 1467 polo rei Enrique IV de Castela, que permitía celebrar un mercado libre de impostos arredor da festividade de San Bartolomeu. A súa recreación moderna naceu a comezos do século XXI e, co paso do tempo, converteuse nunha das festas de referencia en Galicia, ocupando toda a zona monumental da cidade.