A Feira Talentia arranca con máis de 2.000 prazas formativas e 500 citas con empresas
A Feira Talentia de emprego e formación, que terá lugar entre o 9 e o 11 de decembro, inicia a súa nova edición con cifras récord de participación. Desde o mes de novembro, preto de 25.000 persoas accederon á web da feira virtual, e só nas primeiras 12 horas tras a apertura das inscricións rexistráronse máis de 3.000 sesións.
A día de hoxe, xa están reservadas máis de 2.000 prazas nas diferentes actividades formativas, e a oferta de cursos online, así como as certificacións de inglés, está completamente esgotada. Aínda quedan prazas dispoñibles na aula virtual, que ofrece acceso á plataforma Linkedin Learning con máis de 15.000 cursos, así como no programa Talentia IT Skills, que permite participar en formación oficial de tecnoloxías como Microsoft, Cisco, Meta ou JavaScript. Para estas actividades online, establecíuse un límite de catro inscricións por persoa.
A feira tamén está a rexistrar unha alta demanda no apartado de orientación laboral. Xa se axendaron máis de 500 citas con responsables de selección de persoal de empresas e con mentores, sen límite máximo de reservas. Nesta edición participan preto de 60 empresas de sectores moi diversos, o que amplía as oportunidades tanto de emprego como de contacto profesional.
A Feira Talentia consolídase así como un espazo de referencia para a mellora da empregabilidade, a formación especializada e o encontro directo entre persoas candidatas e empresas nun formato 100 % virtual.