A Festa do Marisco volve a Vigo cunha nova edición no Berbés
A cidade de Vigo recupera este ano a súa Festa do Marisco, que volverá ao porto pesqueiro do Berbés entre o 4 e o 7 de setembro, tras seis anos sen celebrarse. A XVIII edición foi presentada hoxe polo alcalde, Abel Caballero, acompañado de representantes da organización, ACOPEVI, presidida por Juan López, xunto co vicepresidente Roberto Otero e a xerente Mar Amate. Tamén participaron as concelleiras de Comercio e Turismo, Ana Laura Iglesias e María Lago.
Caballero definiu a cita como “unha gran festa” e animou á cidadanía a achegarse ao Berbés para gozar da gastronomía mariñeira, acompañada de música en directo e diversas actividades paralelas.
Pola súa parte, Juan López destacou a importancia desta celebración: “Por tradición temos o mellor marisco, o mellor produto está en Vigo e a mellor festa do marisco está en Vigo”.
Con esta nova edición, a Festa do Marisco de Vigo busca consolidarse como un dos eventos gastronómicos de referencia en Galicia, unindo tradición, cultura mariñeira e promoción do produto local.