A Fiscalía e Medio Rural reúnense para reforzar a coordinación na prevención dos incendios forestais
A fiscala superior da Comunidade Autónoma de Galicia, Carmen Eiró, mantivo un encontro de traballo co director xeral de Defensa do Monte, Manuel Francisco Gutiérrez, e con integrantes da Unidade de Investigación de Incendios Forestais (UIFO) da Consellería do Medio Rural, co obxectivo de avanzar na coordinación institucional ante a nova campaña de prevención de incendios forestais de 2026.
Durante a reunión abordáronse distintas cuestións estratéxicas relacionadas coa prevención, investigación e persecución penal dos incendios forestais, unha materia na que a Fiscalía de Galicia ven desempeñando un papel fundamental, tanto na coordinación das investigacións como no impulso das actuacións xudiciais dirixidas á identificación dos responsables e á imposición das correspondentes penas.
No encontro analizouse especialmente a incorporación das novas tecnoloxías á investigación dos delitos de incendios forestais, destacando o emprego de ferramentas de análise avanzada, sistemas de xeolocalización, drons e técnicas de investigación que permiten mellorar a eficacia na identificación da orixe dos lumes e dos seus autores.
Así mesmo, púxose en valor a necesidade de reforzar a cooperación transfronteiriza entre España e Portugal, especialmente no marco da Comisión Mixta Hispano-Lusa de Oporto de 2018, un órgano de colaboración bilateral creado para mellorar a coordinación entre ambos países en materia de prevención, extinción e investigación dos incendios forestais que afectan ás zonas fronteirizas, facilitando o intercambio de información e actuacións conxuntas entre autoridades e corpos especializados.
Na reunión tamén se abordou o desenvolvemento do PLADIGA (Plan de prevención e defensa contra os incendios forestais de Galicia), instrumento estratéxico da Xunta de Galicia que establece os medios, recursos e medidas de prevención, vixilancia e resposta fronte aos incendios forestais, e que constitúe unha ferramenta esencial para a protección do monte galego.
A Fiscalía Superior de Galicia reafirma así o seu compromiso coa protección do medio natural, a seguridade das persoas e a defensa do interese público, incidindo na importancia da prevención, da investigación rigorosa e da resposta penal fronte ás condutas delituosas que poñen en risco o patrimonio forestal galego.