Rural

A organización agraria insta á Xunta a liderar unha proposta propia para defender os intereses do rural galego na futura PAC 2028-2034

A Federación Rural Galega (FRUGA) fixo un chamamento á Xunta de Galicia para que asuma un papel activo nas negociacións da futura Política Agraria Común (PAC) correspondente ao período 2028-2034 e impulse unha posición de país que garanta a defensa dos intereses do sector agrogandeiro galego.

A demanda prodúcese tras a celebración, o pasado 17 de xullo en Visantoña, no concello de Santiso, dun seminario organizado pola entidade para analizar o futuro da PAC. No encontro participaron representantes parlamentarios e profesorado da Universidade de Santiago de Compostela, que abordaron tanto o estado das negociacións como as liñas estratéxicas da proposta presentada pola Comisión Europea para o novo marco financeiro comunitario.

Segundo a FRUGA, unha das principais preocupacións é a intención da Comisión Europea de integrar a política agraria nun fondo máis amplo que tamén incluiría outras áreas como a política pesqueira, a seguridade ou o control das fronteiras. A organización considera que este cambio suporía unha perda de peso da PAC dentro das políticas comunitarias e unha redución dos recursos destinados ao desenvolvemento do medio rural.

Outra das cuestións que suscita preocupación é o maior protagonismo que terán os estados membros na definición das prioridades e no reparto dos fondos europeos. Neste sentido, a FRUGA advirte de que o Goberno central xa iniciou contactos con organizacións agrarias de ámbito estatal para avanzar no deseño da futura PAC.

A organización agraria sostén que Galicia conta cunha realidade produtiva diferenciada e lembra que, historicamente, as negociacións desenvolvidas exclusivamente no ámbito estatal deixaron nun segundo plano as necesidades específicas do agro galego. Por iso, considera imprescindible que exista unha representación propia que traslade ás institucións estatais e europeas as demandas do sector galego.

Neste contexto, a FRUGA reclama que a Xunta convoque ás organizacións agrarias galegas e aos representantes dos distintos sectores produtivos co obxectivo de elaborar unha proposta común para a PAC 2028-2034. O propósito é que ese documento sirva de base para defender os intereses de Galicia durante o proceso de negociación co Estado.

Ademais, a federación anunciou que iniciará unha rolda de contactos cos grupos representados no Parlamento de Galicia e cos deputados galegos no Congreso para solicitar o seu apoio e reclamar que a posición galega estea presente nas negociacións da futura Política Agraria Común.