A intelixencia artificial, a innovación e o liderado empresarial centran o II Fórum do Peixe e Produtos do Mar en Vigo
O vindeiro 3 de xullo, a Sede Afundación de Vigo reunirá aos principais axentes do sector no Fórum do Peixe e Produtos do Mar 2025. Esta segunda edición, organizada pola revista TecnoSEAFOOD de Interempresas Media e Abanca, centrarase na innovación tecnolóxica, a intelixencia artificial, a sustentabilidade e as novas estratexias comerciais para mellorar a competitividade.
O evento dividirase en tres bloques temáticos: o primeiro, sobre o reto de aumentar as vendas, contará con relatorios de expertas como Mª Luisa Álvarez (Fedepesca) ou Sofía Roca (Azti); o segundo centrado en avances como as altas presións ou o uso da IA, con intervencións de Anfaco-Cecopesca, Hiperbaric ou a Universidade da Coruña; e o terceiro abordará o liderado empresarial e a captación de talento, cunha mesa redonda moderada por Abanca Mar e participación de responsables de RRHH de empresas líderes como Pescapuerta, Jealsa ou Stolt Sea Farm.
Ademais, o Fórum contará cunha zona expositiva con innovacións tecnolóxicas para o sector e co apoio de entidades como Anfaco, Fedepesca, Azti, Clusaga, Conxemar e PTEPA. A inscrición é gratuíta a través da web oficial.