A Mariña volverá unir deporte e memoria na XIII edición do torneo Heroes do Orzán
A Mariña converterase un ano máis no epicentro do fútbol sala base coa celebración da XIII edición do torneo Heroes do Orzán, unha cita que reunirá entre o 25 e o 29 de xuño a máis de 1.000 deportistas e preto dun cento de equipos chegados de diferentes comunidades autónomas e de Portugal.
A presentación oficial do evento tivo lugar no Pazo de San Marcos, onde representantes institucionais, organizadores e familiares de Rodrigo Maseda Lozano destacaron o valor humano e deportivo dunha competición que mantén viva a memoria do policía nacional burelés falecido en 2012 durante o intento de rescate dun mozo na praia do Orzán, na Coruña. Naquel operativo tamén perderon a vida os seus compañeiros José Antonio Villamor e Javier López.
Organizado pola Fundación Imdecum co respaldo da Vicepresidencia da Deputación de Lugo, o torneo disputarase en instalacións deportivas de Burela, San Cibrao, Xove, Viveiro e Foz, ampliando así o seu alcance por toda a comarca e consolidándose como unha das competicións de referencia do fútbol sala formativo no noroeste peninsular.
Nesta edición participarán 97 equipos pertencentes a todas as categorías de base, desde biberón ata xuvenil, que protagonizarán arredor de 200 encontros ao longo de cinco intensas xornadas. Ademais dos conxuntos galegos, estarán presentes clubs procedentes de Asturias, Cantabria, Castela e León, Madrid e Portugal, o que reforza o carácter interterritorial do campionato.
O acto de presentación contou coa presenza de Isabel Lozano, nai de Rodrigo Maseda, quen agradeceu as mostras de afecto recibidas ao longo destes anos e destacou a importancia de que a homenaxe continúe ligada ao deporte base. Segundo sinalou, ver centos de nenas e nenos participando nesta cita representa unha maneira especial de manter vivo o recordo do seu fillo.
Durante a presentación, os representantes da Deputación de Lugo reafirmaron o apoio institucional a unha iniciativa que combina valores deportivos, convivencia e memoria colectiva. Tamén participaron responsables da Fundación Imdecum, representantes municipais de distintos concellos da Mariña, membros da Xunta de Galicia e colaboradores da proba.
Entre os asistentes atopábanse tamén diversos responsables da Policía Nacional, entre eles Francisco José Vázquez Fernández, inspector xefe da Brigada Provincial da Policía Xudicial; José Luis Mourín González, subinspector e xefe do Gabinete Técnico; e Roberto Saa Ramos, inspector da Comisaría da Policía Nacional en Viveiro.
Máis alá da vertente deportiva, a organización traballa estes días na coordinación da chegada dos equipos visitantes. Boa parte dos participantes e acompañantes hospedaranse en establecementos hostaleiros de Viveiro, Cervo, Foz, Burela e Barreiros, unha afluencia que xerará un importante movemento económico na comarca durante os días de competición.
Co paso dos anos, Heroes do Orzán converteuse nun referente do deporte base galego e nun símbolo de solidariedade e compromiso. Un torneo que cada verán transforma as pistas da Mariña nun espazo de encontro para centos de mozos deportistas e nun recordo permanente do sacrificio e da valentía de quen entregaron a súa vida intentando salvar a dos demais.