Actualidade

A rede pública de albergues do Xacobeo rexistrou 261.073 noites entre xaneiro e novembro de 2025, un 3,2 % máis que no mesmo período do ano anterior. O Camiño Francés continúa sendo a ruta máis demandada e A Coruña lidera as pernoctacións por provincias.

A ocupación nos albergues da rede pública do Xacobeo continúa medrando en 2025. Entre os meses de xaneiro e novembro rexistráronse un total de 261.073 noites, o que supón 8.244 máis que no mesmo período de 2024 e un incremento do 3,2 %.

Os datos, feitos públicos este 25 de decembro en Santiago de Compostela, confirman o bo momento do Camiño de Santiago, á espera de coñecer as cifras do mes de decembro e con máis de 500.000 compostelas xa entregadas.

Por meses, agosto foi o de maior afluencia, con 38.799 noites, seguido de xullo (35.190), setembro (32.662), maio (32.594) e xuño (31.907). No período comprendido entre maio e setembro superáronse as 30.000 noites mensuais, consolidando a tempada central como a de maior actividade.

Desde a Xunta de Galicia destacan tamén os bos datos de abril, con 28.515 noites —marcadas pola Semana Santa— e de outubro, con 27.492, que amosan un avance na estratexia de desestacionalización do Camiño.

Por rutas, o Camino Francés continúa sendo a máis demandada, con 107.274 noites. Séguenlle o Camiño Portugués, con 57.281 noites e o maior crecemento absoluto respecto a 2024; o Camiño Inglés, con 20.270; o Camiño Mozárabe–Vía da Prata, con 18.588; e o Camiño Primitivo, con 17.847 noites.

Por provincias, A Coruña lidera o número de pernoctacións, con 100.904 noites, seguida de Lugo (87.084), Pontevedra (59.348) e Ourense (13.727).

Ademais das compostelas entregadas, Turismo de Galicia está a empregar ferramentas de big data e sensores para analizar os fluxos de peregrinas e peregrinos. Cos datos actualizados a outubro de 2025, estímase que por cada Compostela emitida circulan de media 1,7 peregrinos polas principais rutas xacobeas.