Sanidade

A actividade gripal en Galicia continúa cunha intensidade media e mostra unha tendencia á baixa, aínda que deberá confirmarse a vindeira semana

A Consellería de Sanidade publicou o informe de actividade das infeccións respiratorias agudas correspondente á semana do 8 ao 14 de decembro, no que se indica que a onda epidémica da gripe en Galicia mantense en intensidade media, cunha tendencia decrecente.

Con respecto á semana anterior, rexistrouse un descenso do 10,6 % na taxa de consultas por gripe en atención primaria, que se sitúa en 109,2 consultas por cada 100.000 habitantes. O grupo de idade con maior taxa de consultas continúa sendo o de nenos e nenas de 0 a 4 anos, con 247,6 consultas por 100.000 habitantes, seguido do grupo de 5 a 19 anos, con 176,9.

Por áreas sanitarias, a taxa de consultas foi inferior á da semana previa en todas elas agás en Vigo, onde aumentou un 2,7 %. Os maiores descensos rexistráronse na área da Coruña, cun 29,4 %, e na de Ferrol, cun 27,4 %.

No que respecta aos ingresos hospitalarios, durante a última semana ingresaron 360 persoas con gripe confirmada, o que supón un lixeiro incremento do 0,8 % respecto da semana anterior. O grupo de persoas maiores de 80 anos continúa presentando a maior taxa de ingresos hospitalarios.

O aumento da taxa de ingresos observouse en todos os grupos de idade agás nos de 60 a 79 anos e nos maiores de 80, nos que descendeu un 8,8 % e un 5 %, respectivamente. O incremento máis significativo produciuse no grupo de 5 a 19 anos, que case triplicou a súa taxa, e no de 0 a 4 anos, cun aumento do 51 %.

Por áreas sanitarias, Pontevedra foi a que rexistrou o maior incremento da taxa de ingresos, cun 39,2 %, mentres que Lugo presentou a taxa máis elevada, con 20,9 ingresos por cada 100.000 habitantes.

Desde o inicio da tempada de gripe notificáronse un total de 2.060 ingresos hospitalarios, a maioría asociados ao virus da gripe tipo A. Ademais, a rede de farmacias sentinela informou dun descenso do 4,3 % na dispensación de antigripais e do 14,6 % nas probas de antíxenos.

A pesar desta evolución favorable, Sanidade advirte de que a tendencia deberá confirmarse a vindeira semana, xa que os datos poderían estar condicionados polo festivo do 8 de decembro e polas catro xornadas de folga médica contra o Estatuto Marco do Goberno central.

Ante esta situación, recoméndase o uso de máscara ao acudir a centros de saúde, puntos de atención continuada e servizos de urxencias hospitalarias, mesmo en ausencia de síntomas. Esta recomendación mantense tamén nos servizos que atenden a pacientes vulnerables, como UCI, reanimación, transplantes, oncoloxía, hematoloxía, diálise e hospitais de día.