A provincia de Ourense lidera o número de solicitudes para a rehabilitación de inmobles destinados a vivendas de alugueiro accesible
A provincia de Ourense foi a que máis peticións presentou dentro do programa da Xunta para a rehabilitación de inmobles de titularidade municipal con destino a vivendas de alugueiro accesible. En total, suma 27 solicitudes desde que se abriu o prazo o mes pasado.
En conxunto, a Xunta recibiu 60 solicitudes de concellos interesados en acollerse a estas axudas. Así o detallou a conselleira de Vivenda e Planificación de Infraestruturas, María Martínez Allegue, durante a entrega dunha vivenda no municipio ourensán de Riós, recuperada ao abeiro destas subvencións.
Allegue explicou que a vivenda entregada a unha familia deste municipio foi posible grazas a dous apoios autonómicos. En primeiro lugar, o Concello de Riós adquiriu o inmoble mediante un préstamo do Fondo de Cooperación da Xunta. Posteriormente, acometeu a súa reforma con cargo ao programa de axudas para vivendas de titularidade municipal, que cobre ata o 95 % do custo da actuación.
A conselleira visitou o inmoble, situado no núcleo de San Cristovo, que tras o seu acondicionamento dispón agora de cociña, baño, salón e tres dormitorios.
Estas axudas, dirixidas a concellos de menos de 30.000 habitantes, poden solicitarse desde o mes de xaneiro. Ata o momento, 42 municipios presentaron solicitudes para rehabilitar un total de 82 vivendas.
A titular de Vivenda destacou que este ano a Xunta incrementou nun 30 % a contía destinada a este programa, que alcanza os 2,1 millóns de euros. As subvencións poden chegar ata 65.000 euros con carácter xeral e ata 68.000 euros no caso de actuacións en Áreas de Rehabilitación Integral (ARI) dos Camiños de Santiago ou da Ribeira Sacra.
Así mesmo, subliñou o dobre obxectivo destas axudas: facilitar novos fogares e contribuír a fixar poboación, especialmente nos municipios rurais. Finalmente, agradeceu ao Concello de Riós a súa colaboración e remarcou a importancia da cooperación entre administracións para favorecer o acceso á vivenda.