A Quiroga Bike Marathon inicia a conta atrás para a edición deste ano
A Quiroga Bike Marathon 2026 entra na súa recta final. Este mércores, 19 de agosto, comeza a conta atrás dun mes para a celebración da proba, prevista para o próximo 19 de setembro en Quiroga e que reunirá afeccionados ao ciclismo de montaña.
A organización mantén aberto o prazo de inscrición e anima ás persoas interesadas en participar a reservar o seu dorsal con antelación. Nas próximas semanas continuarán os preparativos da proba, que nesta edición contará tamén con sorpresas e sorteos para os participantes.
A competición ofrecerá dúas modalidades adaptadas a diferentes niveis de esixencia. A Bike Marathon contará cun percorrido de 45 quilómetros e un desnivel positivo de 1.300 metros, mentres que a Bike Extreme terá unha distancia de 65 quilómetros e acumulará 2.300 metros de desnivel positivo.
Os dous itinerarios transcorrerán por camiños e paraxes do Concello de Quiroga e do entorno do Xeoparque Montañas do Courel. Os percorridos combinarán zonas rápidas, descensos e tramos técnicos.
A participación poderá realizarse tanto de maneira individual como por parellas e non será necesario dispoñer de licenza federativa. A inscrición inclúe bolsa do corredor, seguro deportivo e cronometraxe mediante chip.
A falta dun mes para a celebración da Quiroga Bike Marathon, a organización afronta as últimas semanas de preparación e lembra que o prazo de inscrición continúa aberto para as persoas afeccionadas que queiran participar na proba.