Educación

A lección maxistral correu a cargo do catedrático Jesús F. Salgado Velo, que abordou a relación entre o xuízo experto e os algoritmos na selección de persoal e na adquisición de talento

A reitora da Universidade de Santiago de Compostela (USC), Rosa M. Crujeiras, reivindicou “o espazo, o tempo e a voz” da institución durante o acto de apertura do novo curso académico, celebrado este venres no Salón Nobre do Colexio de Fonseca. O novo curso estará marcado pola elaboración do novo Plan Galego de Financiamento Universitario para o período 2028-2032, no que a USC defenderá un modelo que valore a súa excelencia, garanta estabilidade e teña en conta as diferentes realidades das tres universidades públicas galegas.

Crujeiras destacou tamén a necesidade de xestionar con eficiencia e reclamar os recursos suficientes, vinculando esta tarefa á autonomía universitaria. Neste sentido, defendeu unha formación que vaia máis alá das aulas e que inclúa cultura, deporte, participación e comunidade.

A reitora sinalou como retos para esta nova etapa a planificación dos cadros de persoal, a adaptación da formación ás novas necesidades, o avance na igualdade, a atención á diversidade e a inclusión e a defensa do patrimonio. Tamén apuntou á integración de titulacións adscritas e ao desenvolvemento do Grao en Medicina.

Entre os obxectivos figura igualmente reforzar a internacionalización, a investigación e a transferencia de coñecemento, así como poñer en valor o traballo dos distintos colectivos da Universidade.

Durante o acto tamén se presentou a Memoria do curso 2025-2026, que recolleu a actividade docente, investigadora, cultural e de xestión da USC, con 53 graos, 79 títulos de máster e 57 programas de doutoramento. A Universidade contou con 25.757 estudantes, aos que se sumaron 2.642 matriculados en estudos propios.

Pola súa banda, a presidenta do Consello do Estudantado, Iria Liñares Cereixo, reivindicou o uso do galego na docencia e unha universidade pública na que estudar non sexa un privilexio. Pediu máis residencias públicas, vivenda accesible, bolsas suficientes, mellores conexións entre campus e transporte público digno.

A lección maxistral correu a cargo do catedrático Jesús F. Salgado Velo, que abordou a relación entre o xuízo experto e os algoritmos na selección de persoal e na adquisición de talento.

Segundo Salgado, a evidencia científica amosa o valor do xuízo experto, aínda que os algoritmos superaron as súas capacidades preditivas, polo que as organizacións poden optar polo seu uso exclusivo ou combinalos co criterio dos especialistas.