A UDC acada a súa mellor marca histórica nun dos grandes rankings universitarios internacionais
A Universidade da Coruña continúa avanzando nos rankings internacionais e acaba de acadar a súa mellor clasificación histórica no Center for World University Rankings (CWUR), unha das clasificacións globais de referencia no ámbito académico. Na edición de 2026, a UDC sitúase no posto 981 a nivel mundial entre máis de 21.000 universidades analizadas, o que a coloca dentro do 4,7% das mellores institucións universitarias do planeta.
O resultado supón unha mellora de catro posicións con respecto á edición anterior e confirma a tendencia ascendente da institución nos últimos anos. No ámbito estatal, a Universidade da Coruña mantense no posto 34, igualando tamén a súa mellor marca dentro do sistema universitario español.
A clasificación publicada esta semana outórgalle á UDC unha puntuación global de 70,7, a máis alta desde que a universidade coruñesa forma parte deste ranking. O dato reforza a evolución positiva dunha institución que nos últimos anos consolidou a súa presenza internacional, especialmente pola súa actividade investigadora e pola empregabilidade do seu alumnado egresado.
Entre os indicadores avaliados destaca o rendemento en investigación, apartado no que a UDC alcanza o posto 941 do mundo. Tamén mellora no ámbito da empregabilidade, cunha posición 1230 que representa o mellor resultado da Universidade da Coruña neste indicador nos últimos seis anos.
O CWUR elabora a súa clasificación a partir de criterios como a calidade da educación, a empregabilidade das persoas tituladas, o prestixio do persoal académico e o rendemento investigador. Este último apartado ten un peso especialmente relevante, xa que representa o 40% da puntuación total.
Para realizar o ranking, o Center for World University Rankings emprega fontes internacionais como Thomson Reuters’ Journal Citation Reports, European Reference Index for the Humanities, a Organización Mundial da Propiedade Intelectual e datos vinculados a recoñecementos como os Premios Nobel, as Medallas Fields, os Premios Abel ou a lista Forbes Global 2000.
Desde 2019, a Universidade da Coruña vén mellorando de forma progresiva a súa posición global nesta clasificación. O posto acadado en 2026 confirma esa evolución e reforza a proxección da UDC como unha institución cada vez máis competitiva no mapa universitario internacional.