A USC crea o programa Fénix para incorporar persoal investigador tras quedar fóra do Ramón y Cajal
A Universidade de Santiago de Compostela (USC) puxo en marcha o programa Fénix, unha iniciativa propia creada para dar resposta á situación xerada despois de que a institución quedase fóra da convocatoria Ramón y Cajal de 2025. O programa busca facilitar a incorporación ou continuidade na USC de persoal investigador seleccionado naquela convocatoria que expresase a súa vontade de desenvolver a súa carreira científica na Universidade.
O Consello de Goberno da USC deu o seu visto bo a esta iniciativa, de carácter extraordinario e limitado especificamente á convocatoria Ramón y Cajal de 2025. Segundo explicou a vicerreitora de Investigación e Ciencia Aberta, Almudena Hospido, o obxectivo é recuperar parte do talento investigador e ofrecer unha resposta institucional á situación creada.
"O que propoñemos é un instrumento propio, extraordinario e limitado a esta convocatoria que permita á Universidade recuperar, na medida do posible, parte dese talento e, ao tempo, asumir a responsabilidade institucional derivada da situación creada", sinalou Hospido durante un acto no Campus Terra de Lugo.
O programa Fénix pretende ofrecer ás persoas investigadoras un marco de desenvolvemento profesional e científico tomando como referencia as condicións que terían mediante a axuda Ramón y Cajal de 2025. Ademais, busca favorecer a súa participación en futuras convocatorias competitivas destinadas á captación e consolidación de talento investigador.
A iniciativa establece as condicións de incorporación e vinculación deste persoal coa USC, así como os recursos destinados ao desenvolvemento da súa actividade científica e un itinerario orientado á súa eventual consolidación. Este último estará condicionado ao cumprimento dos requisitos legais e dos procedementos de planificación, autorización e aprobación correspondentes.
O persoal investigador que se incorpore ao programa tamén asumirá o compromiso de participar, sempre que cumpra os requisitos de elixibilidade, en futuras convocatorias Ramón y Cajal ou noutros programas competitivos de excelencia de ámbito autonómico, estatal ou europeo que permitan financiar total ou parcialmente a súa contratación, actividade investigadora ou consolidación na USC.
Catro prazas en distintas áreas científicas
Fénix contempla exclusivamente catro prazas, distribuídas entre diferentes ámbitos da investigación. Unha delas corresponde á área de Biociencias e Biotecnoloxía, no Departamento de Fisioloxía e con adscrición ao CIMUS.
As outras dúas prazas están vinculadas á área de Biomedicina, tamén no Departamento de Fisioloxía e con adscrición ao CIMUS. A cuarta corresponde á área de Ciencias Físicas, no Departamento de Física de Partículas e con adscrición ao IGFAE.
A incorporación ao programa poderá requirir, cando corresponda, que as persoas interesadas renuncien á axuda para a que foran seleccionadas na convocatoria Ramón y Cajal de 2025, de acordo cos prazos e condicións que se establezan.
A USC anuncia cambios nos procedementos
Durante a mesma reunión do Consello de Goberno, a reitora da USC, Rosa Crujeiras, informou tamén de que, tras o proceso de información reservada relacionado coa convocatoria Ramón y Cajal, a Universidade decidiu introducir cambios con carácter urxente na operativa e nos procedementos organizativos da Subárea de Convocatorias e Programas de Recursos Humanos.
O obxectivo desta intervención será, segundo avanzou a reitora, "evitar estas situacións no futuro" e mellorar o funcionamento dos procedementos relacionados coas convocatorias de incorporación e consolidación de persoal investigador.