A USC premia os mellores expedientes de Formación Profesional de Galicia nun acto en Lugo
“Hoxe celebramos os vosos excelentes resultados académicos, pero tamén algo que vai máis alá das cualificacións: celebramos o esforzo, a constancia, a capacidade de superación e o compromiso que vos trouxo ata aquí”. Con estas verbas se dirixiu a reitora Rosa Crujeiras ao estudantado que participou no acto co que a Universidade de Santiago de Compostela recoñece os mellores expedientes de Formación Profesional de Galicia. Trátase de 227 estudantes de 54 centros de toda a comunidade, a maioría dos cales asistiron á sesión que se desenvolveu este mércores 10 no auditorio da Facultade de Veterinaria do Campus de Lugo.
Sabemos, explicou a reitora, que “detrás de cada expediente de excelencia hai moitas horas de estudo, de traballo e de dedicación”. Hai momentos de satisfacción, engadiu, “pero tamén dificultades que foi preciso superar. Por iso, este recoñecemento ten un valor especial: porque acredita non só o que aprendestes, senón tamén a vosa capacidade para perseverar e dar o mellor de vós”. Rosa Crujeiras fixo extensible a felicitación ao profesorado e ás familias que acompañaron cada proceso de aprendizaxe e detívose no paso decisivo que este estudantado deu ao presentarse á Proba de Acceso á Universidade (PAU).
A reitora puxo o foco en todo o que a USC pode achegarlles a partir deste intre e de cara aos vindeiros anos. “Este diploma recoñece o esforzo realizado ata agora, mais representa tamén un convite a seguir avanzando, a seguir aprendendo e a seguir confiando nas vosas capacidades”, dixo. Neste senso, lembroulles que se recalan na USC, atoparán “un lugar onde non só se aprenden respostas, senón tamén a formular boas preguntas. Onde se desenvolve o pensamento crítico, a creatividade e a vontade de seguir explorando novos camiños”. Ademais, continuou Rosa Crujeiras, “atoparedes unha comunidade formada por miles de estudantes, profesoras, profesores, investigadoras, investigadores e profesionais que comparten a curiosidade por aprender, a vontade de avanzar e o compromiso de contribuír a unha sociedade mellor”.
Sobresaínte
O acto, que novamente se desenvolve no Campus de Lugo, serve para homenaxear o estudantado dos ciclos superiores de Formación Profesional cunha nota media de sobresaínte. Na edición deste ano, foron convocados un total de 183 mulleres e 44 homes.
Ademais da reitora, integraron a mesa presidencial Roberto Bande, vicerreitor de Coordinación do Campus de Lugo; Ana Cabana, vicerreitora de Cultura, Lingua e Patrimonio; Marcelo Maneiro, vicerreitor de Innovación e Transferencia do Coñecemento; Diana Fernández Méndez, delegada da reitora para Asuntos de Ensino Medio e Coordinadora do Programa A Ponte; José A. Díez de Castro, secretario xeral de Universidades; Alfonso Villares Bermúdez, delegado territorial da Xunta de Galicia na provincia de Lugo; Javier Vázquez Prado, concelleiro de Cultura e Educación do Concello de Lugo; Adelaida Saá Sarria, directora do CIFP A Carballeira-Marcos Valcárcel (Ourense), en representación do profesorado; e Noé Costoya López, estudante do IES Francisco Daviña Rey (Monforte de Lemos), en representación do estudantado.