Concello

A delegada territorial de Ferrol, Martina Aneiros, visitou o centro sociocultural Outeiro de Chanteiro, en Ares, onde lembrou que os concellos de menos de 30.000 habitantes poden optar a estas axudas da Consellería de Presidencia, Xustiza e Deportes, dotadas con 5 millóns de euros para os anos 2025-2026. As achegas cubrirán ata o 80% dos custos das melloras en illamento, iluminación interior e climatización, cun límite de 120.000 euros por proxecto.

Ares (A Coruña), 3 de marzo de 2025. A delegada territorial da Xunta en Ferrol, Martina Aneiros, supervisou esta mañá as obras de mellora da eficiencia enerxética do centro sociocultural Outeiro de Chanteiro, en Ares, executadas cunha achega da Consellería de Presidencia, Xustiza e Deportes de máis de 81.000 euros.

A intervención permitiu reducir a demanda enerxética do inmoble mediante a mellora da envolvente térmica, o illamento das fachadas e a instalación de carpintería e vidros con boas características térmicas. Tamén se renovou a iluminación, substituíndoa por luminarias tipo LED, e se mellorou o sistema de calefacción, eliminando a caldeira de gasóleo e instalando unha bomba de calor.

Segundo explicou Aneiros, estas axudas están dotadas con 5 millóns de euros para os anos 2025-2026, e están cofinanciadas con fondos FEDER. Poderán solicitalas os concellos de menos de 30.000 habitantes para a execución de proxectos de eficiencia enerxética en edificios e infraestruturas vinculadas á prestación de servizos municipais.

As actuacións subvencionables inclúen:
✔ Mellora da envolvente térmica, con illamento en cubertas e fachadas.
✔ Renovación de ventás e acristalamentos con materiais de alto rendemento térmico.
✔ Iluminación eficiente con tecnoloxía LED e sistemas de control automático.
✔ Actualización dos sistemas de climatización, calefacción e auga quente, priorizando o uso de enerxías renovables.

A delegada territorial lembrou que o prazo de solicitude das axudas está aberto ata o 13 de marzo e permitirán cubrir ata o 80% dos custos das melloras, cun máximo de 120.000 euros por proxecto.

"Con esta convocatoria, a Xunta continúa apoiando aos concellos no aforro enerxético, contribuíndo á redución das emisións de gases de efecto invernadoiro e á loita contra o cambio climático", afirmou Aneiros. Tamén destacou que estas accións están aliñadas coa Estratexia de Cambio Climático e Enerxía 2050 e forman parte do Programa FEDER Galicia 2021-2027.