Actualidade

A Xunta de Galicia aprobou dúas novas ofertas de emprego público no ámbito sanitario que suman 123 prazas, con especial atención aos postos de difícil cobertura no Servizo Galego de Saúde.

O Consello da Xunta aprobou dúas novas ofertas de emprego público no ámbito sanitario que suman un total de 123 prazas, segundo anunciou o conselleiro de Presidencia, Xustiza e Deportes, Diego Calvo, tras a reunión semanal do Executivo autonómico.

A principal destas convocatorias inclúe 100 prazas para postos de difícil cobertura nos diferentes centros do Servizo Galego de Saúde. En concreto, ofértanse 41 prazas de facultativos especialistas en hospitais comarcais, 27 de médicos de urxencias e 32 de pediatras de atención primaria, das cales 7 estarán reservadas ao turno de discapacidade xeral.

Con esta oferta, a Xunta complementa a aprobada previamente mediante o Decreto 52/2025, do 23 de xuño, e esgota a taxa máxima de reposición de efectivos do 120 %, ao tratarse dun sector considerado prioritario pola lexislación básica do Estado.

Na mesma sesión, o Consello da Xunta tamén aprobou un segundo decreto que dá luz verde a unha oferta pública de emprego de 23 prazas vinculadas ao ámbito da saúde pública e da administración sanitaria, correspondentes ás escalas sanitarias reguladas pola Lei 17/1989.

Estas prazas repártense en 5 de farmacéutica inspectora de saúde pública, 7 de inspectora médica (unha reservada ao turno de discapacidade), 1 de licenciada en ciencias biolóxicas e 10 de subinspectora sanitaria (unha reservada ao turno de discapacidade). O sistema de acceso será o de concurso-oposición, respectando os principios de igualdade, mérito e capacidade, e esgotando neste caso a taxa de reposición do 110 %, ao tratarse dun sector non prioritario.

Ademais, a Consellería de Sanidade informou ao Consello da Xunta da próxima convocatoria de 54 prazas de persoal funcionario sanitario, correspondentes ás ofertas públicas de emprego dos anos 2022, 2023 e 2024. Estas prazas cubriranse tamén mediante concurso-oposición e distribúense entre 12 farmacéuticas inspectoras, 10 inspectoras médicas, 2 licenciadas en ciencias biolóxicas, 3 en ciencias químicas, 8 en farmacia, 4 en psicoloxía, 7 de enfermaría e 8 subinspectoras sanitarias.

Con estas convocatorias, o Goberno galego busca dar resposta ás necesidades organizativas e de persoal do sistema sanitario público, reforzando a calidade asistencial, a eficiencia no uso dos recursos e a estabilidade profesional do persoal sanitario en Galicia.