A Xunta aproba un plan para extender o uso da intelixencia artificial en Galicia
O presidente da Xunta, Alfonso Rueda, anunciou hoxe que o Consello aprobou o Programa Galego de Intelixencia Artificial 2026-2028, unha folla de ruta dotada con 54 millóns de euros que busca xeneralizar o uso da IA na Administración, nas empresas e no día a día da cidadanía.
Segundo explicou, un dos obxectivos principais é ampliar os servizos públicos con tecnoloxías de IA, reforzando ámbitos como a administración electrónica, a sanidade, o emprego, a seguridade, o transporte ou a xestión de residuos.
Este plan supón a segunda fase da Estratexia Galega de IA 2030, tras completar o despregamento dun marco operativo, tecnolóxico e normativo para o desenvolvemento ordenado desta tecnoloxía en Galicia.
Catro eixos estratéxicos
O programa organízase arredor de catro liñas principais:
Galicia Rexión Intelixente, centrada en crear capacidades estruturais para desenvolver a IA.
Talento e competencia en IA, orientada a capacitar á cidadanía e fomentar profesionais especializados.
Adopción estratéxica da IA, tanto na propia Xunta como nas pemes e grandes empresas.
I+i en IA, para promover investigación e innovación no ecosistema académico galego.
A folla de ruta tamén inclúe a creación dunha infraestrutura dixital transversal, con plataformas de datos, analítica avanzada, espazos de proba e modelos de linguaxe propios. Ademais, a Xunta contará con servizos de apoio especializado para xestionar os datos que soportan as plataformas sectoriais.
IA para mellorar a Administración
Entre os usos previstos destacan:
xestión intelixente da atención á cidadanía, con asistentes virtuais e información actualizada;
tramitación electrónica máis áxil mediante procedementos automatizados;
mellora da supervisión e das avaliacións administrativas.
IA para reforzar os servizos públicos
O programa incorpora actuacións como:
xestión intelixente de residuos e autorizacións ambientais;
análise en tempo real para anticipar riscos e mellorar a resposta ás emerxencias;
plataforma de transporte intelixente para optimizar servizos públicos;
sistemas de predición e resposta fronte aos incendios forestais;
reestruturación parcelaria intelixente.
Tamén se prevén melloras en ámbitos como o emprego, a vivenda pública, a planificación do solo, a saúde e o control de ensaios clínicos, a través de asistentes intelixentes e ferramentas de apoio á decisión.
Apoio a concellos e empresas
O programa contempla medidas para facilitar que as entidades locais adopten solucións de IA mediante:
adhesión a acordos marco para simplificar a contratación;
reutilización de proxectos de IA da Xunta.
No tecido empresarial, Rueda destacou programas como:
IA 360, para impulsar a competitividade empresarial;
Ticket Innova, para fomentar servizos avanzados de desenvolvemento tecnolóxico nas pemes, especialmente en sectores tradicionais.
Estas liñas contarán cunha dotación de 4 millóns de euros e estarán dispoñibles en xaneiro.
Impulso á investigación
O programa tamén prevé medidas para apoiar o talento investigador mediante:
bolsas pre e posdoutorais;
doutorados industriais;
axudas para consolidación e crecemento de grupos de investigación;
reforzo dos centros de excelencia científica.
Para garantir unha implantación ética e transparente, a Xunta impulsará órganos de gobernanza como a Oficina Galega de IA, o Consello Galego de IA e un Inventario de sistemas de IA, ademais de estudos de impacto sobre o uso desta tecnoloxía.