A Xunta colabora coa XII Ruta de Pinchos de Teis para fomentar o comercio de proximidade
A delegada territorial da Xunta en Vigo, Ana Ortiz, participou este xoves na presentación da XII Ruta de Pinchos de Teis, que se desenvolverá entre o 19 de agosto e o 14 de setembro co apoio da administración autonómica. Nesta nova edición participan 12 establecementos hostaleiros do barrio vigués, que ofrecerán diferentes propostas gastronómicas.
Ortiz destacou que o obxectivo desta colaboración é fomentar o consumo no comercio de proximidade e apoiar ao sector hostaleiro e comercial de Teis. Ademais, animou á cidadanía a achegarse a probar os petiscos e a participar nunha campaña que repartirá premios entre as persoas asistentes.
No acto de presentación estiveron tamén a presidenta do Centro Comercial Zona Aberta de Teis, Mª Jesús Román; a presidenta do Mercado de Teis, Celia Rial; e varios hostaleiros, que deron a coñecer os seus pinchos.