A Xunta defende en Madrid o modelo galego de impulso á competitividade industrial e captación de investimentos
A directora do Igape, Covadonga Toca, representou hoxe á Xunta de Galicia na reunión do grupo de boas prácticas do Consello Interterritorial de Internacionalización do ICEX. Participou tamén na mesa redonda “Competitividade industrial: Como financiar o futuro?”, celebrada no marco do foro económico Wake Up Spain, en Madrid.
Durante a súa intervención, Toca Carús presentou a Oficina Económica de Galicia como exemplo dun novo modelo de gobernanza orientada á empresa, que sitúa ao tecido produtivo no centro das políticas públicas. Subliñou que esta ferramenta permite simplificar e axilizar procesos para emprender, medrar e investir en Galicia.
En funcionamento desde abril de 2024, a Oficina ofrece un plan individualizado de apoio e asesoramento especializado para cada proxecto, con 100 técnicos expertos en industria, enerxía, innovación, financiamento e sostibilidade. Desde a súa posta en marcha, atendeu máis de 18.700 consultas e asesorou directamente 865 iniciativas empresariais, das cales 193 foron consideradas de especial relevancia.
Ademais, destacou as ferramentas da Xunta para atraer investimentos e activar proxectos industriais estratéxicos como os Proxectos de Interese Autonómico (PIA) e os Proxectos Industriais Estratéxicos (PIE), que permiten reducir á metade os prazos administrativos, adxudicar solo empresarial directamente e conceder axudas sen concorrencia competitiva.
Covadonga Toca defendeu en Wake Up Spain a colaboración público-privada e a planificación proactiva como chaves para unha Galicia máis competitiva e sostible. “En Galicia temos claro que o futuro industrial pasa pola anticipación ás necesidades do tecido produtivo e unha tramitación áxil e eficiente. A Oficina Económica é o reflexo desa nova visión”, concluíu.