A Xunta eleva a nivel 2 a alerta por calor no sur de Pontevedra e suspende a actividade deportiva federada ao aire libre
A Xunta de Galicia elevou a nivel 2 a alerta polo episodio de altas temperaturas no sur da provincia de Pontevedra, afectando ás zonas isoclimáticas do Litoral e do Miño, e activou o nivel 1 no suroeste da Coruña e en Valdeorras (Ourense).
No marco do Plan de Actuacións fronte aos posibles efectos do calor sobre a saúde, a medida inclúe a suspensión de toda a actividade deportiva federada ao aire libre a partir das 13:00 horas deste domingo en 27 concellos das Rías Baixas e 16 do interior de Pontevedra.
Segundo MeteoGalicia, o episodio está provocado pola entrada dunha masa de aire moi cálida de orixe norteafricana que disparará as temperaturas máximas ata valores entre 35 ºC e 40 ºC en boa parte da comunidade, quedando só o norte de Lugo e A Coruña fóra desta situación. En zonas de Pontevedra agárdanse mesmo noites tropicais, mentres que as mínimas no interior serán algo máis suaves.
A previsión apunta a que o episodio se prolongará cando menos ata o xoves —e mesmo ata o venres en determinadas zonas— con risco elevado para a saúde pública.
Recomendacións
A Consellería de Sanidade lembra beber líquidos con frecuencia, evitar bebidas alcohólicas e comidas copiosas, usar roupa lixeira e folgada, protexerse do sol e evitar actividades ao aire libre nas horas centrais do día. En caso de golpe de calor ou esgotamento, recoméndase pedir axuda médica ao 061.