A Xunta emite recomendacións sanitarias para protexer á poboación fronte ao fume e as cinzas dos incendios
A Xunta de Galicia, ante a vaga de incendios forestais que afecta a diversas zonas, trasladou á cidadanía unha serie de recomendacións sanitarias para minimizar os riscos asociados á inhalación do fume e ás partículas de cinza.
O fume xerado polos lumes contén unha mestura de gases e partículas microscópicas (PM2,5 e PM10) que poden provocar irritación nos ollos, nariz, gorxa e pulmóns, ademais de dores de cabeza, dor torácica ou dificultades respiratorias.
Aínda que as medidas son aplicables a toda a poboación, a Xunta pide prestar especial atención aos colectivos máis vulnerables: nenos e nenas, mulleres embarazadas e persoas con enfermidades pulmonares (asma, EPOC) ou cardíacas.
As principais recomendacións son:
Limitar ao máximo as saídas ao exterior e evitar realizar actividade física ao aire libre.
Se é necesario saír, usar mascarillas filtrantes FFP2 e, a ser posible, gafas de protección ocular.
Permanecer dentro das vivendas, mantendo portas e xanelas pechadas, e utilizar sistemas de climatización con filtros de alta eficiencia en modo recirculación.
Empregar purificadores de aire portátiles cando sexa posible.
Evitar o uso de elementos que aumenten a contaminación interior, como velas, e non fumar.
Para a limpeza de cinzas, empregar mascarilla, luvas, roupa de manga longa e gafas.
En caso de contacto coas cinzas, lavar canto antes a pel, ollos ou boca.
Manterse informada a través das mensaxes de emerxencia e consultar en Meteogalicia o índice de calidade do aire (ICA).
A Xunta lembra tamén que, ante cortes de subministro eléctrico, cómpre seguir en todo momento as indicacións das autoridades sanitarias sobre a auga de consumo e a seguridade alimentaria.