A Xunta lanza axudas de case 4 millóns para impulsar a innovación e sustentabilidade do comercio
A Xunta de Galicia vén de publicar no Diario Oficial de Galicia a convocatoria de 2026 das axudas para impulsar a innovación e a sustentabilidade do comercio local e artesanal, cun orzamento de 3,95 millóns de euros e tres liñas de apoio compatibles entre si.
O director xeral de Comercio e Consumo, Gabriel Alén, presentou a iniciativa durante unha visita en Ourense ás tendas Turini Sport e Amodo, beneficiarias destas achegas en convocatorias anteriores.
Entre as principais novidades desta edición destaca a ampliación do período subvencionable, que pasa a incluír actuacións realizadas desde o 25 de outubro de 2025, así como a simplificación administrativa, coa esixencia de menos documentación e a axilización dos procedementos de concesión e dos pagos anticipados. Ademais, increméntase a intensidade da axuda do 80 % xeral ata o 90 % para os establecementos integrados no proxecto de dinamización comercial Vilas Vivas.
A convocatoria enmárcase no Plan Estratéxico do Comercio de Galicia 2025-2030 e ten como obxectivo facilitar a adaptación do sector ás novas tendencias de consumo, promovendo a dixitalización, a modernización dos locais e o compromiso ambiental. Poderán beneficiarse comerciantes minoristas con tenda física e obradoiros inscritos no Rexistro Xeral de Artesanía de Galicia. O prazo de solicitude estará aberto do 16 de xaneiro ao 16 de febreiro.
No que respecta ás actuacións subvencionables, a liña de dixitalización inclúe a implantación e mantemento de páxinas web, ferramentas de posicionamento dixital, terminais de autopago, xestión de redes sociais ou loxística de comercio electrónico, cunha axuda máxima de 15.000 euros. A liña de modernización cobre reformas, melloras de imaxe, eficiencia enerxética e adquisición de equipamento, cunha axuda de ata 16.000 euros. Finalmente, a liña de sustentabilidade ambiental apoia medidas para reducir embalaxes e fomentar materiais reciclados, cun máximo de 2.000 euros por solicitude.
Durante 2025 beneficiáronse destas axudas un total de 728 negocios galegos, cun investimento global próximo aos 3,9 millóns de euros.