A Xunta lanza ConVivimos Digital, un programa de convivencia e uso seguro das tecnoloxías para 4.500 alumnos
Máis de 4.500 alumnos e alumnas de entre 9 e 17 anos participarán este outono nas novas actividades extraescolares da Xunta para o fomento da convivencia dixital e o uso seguro das tecnoloxías. O Goberno galego destina máis de 1 millón de euros ao programa ConVivimos Digital, presentado polo conselleiro de Educación, Ciencia, Universidades e FP, Román Rodríguez, no Parlamento esta mesma semana.
A iniciativa será gratuíta para as familias e enmárcase nos obxectivos da futura Lei de educación dixital, coa que a Xunta regulará o uso das novas tecnoloxías nas aulas.
As actividades desenvolveranse nos propios centros solicitantes entre o 13 de outubro e o 18 de decembro, en horario extraescolar, con dúas sesións semanais de dúas horas e grupos de entre 15 e 25 estudantes. O horario e os días de celebración decidiranse en cada centro.
Poderán solicitar a participación os centros públicos de Primaria, Secundaria, Bacharelato e FP, tendo prioridade o alumnado en situación de maior vulnerabilidade educativa, social ou económica. O prazo de presentación de solicitudes, que deben facer as direccións dos centros a través da Sede Electrónica da Xunta, estará aberto ata o 9 de outubro.
O programa combina formación, obradoiros prácticos e actividades grupais orientadas a potenciar a cooperación, o traballo en equipo e unha convivencia respectuosa. Establécense tres niveis en función da idade:
Competencias dixitais básicas para alumnado de 9 a 11 anos.
Competencias medias para estudantes de 12 e 13 anos.
Competencias avanzadas para rapazas e rapaces de 14 a 17 anos.
A metodoloxía será activa, lúdica e cooperativa, promovendo aprendizaxes significativos e incidindo na educación en valores democráticos, a sustentabilidade e o coñecemento do contorno. O alumnado estará acompañado por persoal cualificado cun nivel axeitado de competencia dixital.
Este programa, financiado con fondos europeos do Mecanismo de Recuperación e Resiliencia, súmase ás accións da Consellería de Educación para reforzar a competencia dixital do alumnado galego enmarcadas na Estratexia de Educación Dixital 2030.