A Xunta lanza novas medidas de reforzo educativo con apoios extraescolares e plans de mellora adaptados a cada centro
O conselleiro de Presidencia, Xustiza e Deportes, Diego Calvo, deu conta da posta en marcha de novas medidas para mellorar o sistema educativo galego, entre as que se inclúe un Programa de reforzo educativo extraescolar para alumnado de 6º de Primaria e un sistema estable de mellora continua que permitirá desenvolver plans integrais adaptados ás necesidades de cada centro.
Segundo explicou Calvo, o novo marco de actuación impulsado pola Xunta está orientado a mellorar os resultados académicos do alumnado galego e a previr as dificultades de aprendizaxe, prestando especial apoio aos estudantes que máis o precisen e favorecendo así a igualdade de oportunidades.
Unha das principais medidas será o Programa de reforzo educativo extraescolar, que se desenvolverá ao longo deste curso e estará dirixido ao alumnado de 6º curso de Educación Primaria. A participación dos centros será voluntaria e o obxectivo será reforzar as aprendizaxes para facilitar a transición á Educación Secundaria Obrigatoria (ESO).
O programa terá un carácter fundamentalmente preventivo e buscará que o alumnado remate a etapa de Primaria coas aprendizaxes, competencias e hábitos necesarios para afrontar adecuadamente a seguinte etapa educativa. Terán prioridade os estudantes propostos polos propios centros que presenten maiores necesidades de reforzo, tendo en conta factores como as dificultades nas aprendizaxes esenciais, o nivel de adquisición das competencias, a evolución académica, as necesidades detectadas polo equipo docente ou posibles situacións de vulnerabilidade socioeducativa.
As actividades desenvolveranse fóra do horario lectivo, preferentemente nos propios centros e en grupos reducidos. Os contidos estarán centrados na consolidación das aprendizaxes esenciais, no reforzo das competencias lectora e matemática, na adquisición de técnicas de estudo e de organización e planificación, así como no desenvolvemento de hábitos de traballo, autonomía e estratexias de aprendizaxe.
A Xunta sinala que esta iniciativa permitirá avanzar nos principios de equidade e igualdade de oportunidades que, segundo a Administración autonómica, caracterizan o sistema educativo galego, ao facilitar o acceso ao reforzo académico con independencia da capacidade económica das familias para recorrer a apoios educativos alternativos.
Paralelamente, a Consellería de Educación impulsará o deseño dun Sistema galego de mellora educativa integrado e estable para identificar dificultades e permitir que os centros, en colaboración coa Inspección Educativa, elaboren plans de mellora adaptados á realidade de cada un deles.
A intención é que os resultados da avaliación e a diagnose do sistema se traduzan en respostas concretas, medibles e axustadas ás necesidades de cada centro. Para iso, tomaranse como referencia os resultados das avaliacións de diagnóstico que se realizan anualmente en 4º de Primaria e 2º da ESO.
Ademais do rendemento competencial, analizaranse variables como o nivel socioeconómico e cultural, a presenza de alumnado en situación de vulnerabilidade ou inmigrante e o tamaño e as características dos centros educativos. A partir destes datos deseñaranse actuacións específicas que poderán centrarse na mellora das competencias clave, na incorporación de novas metodoloxías de aula, na atención á diversidade, na formación do profesorado ou no fortalecemento do liderado pedagóxico.
Estas novas medidas complementarán as iniciativas que xa se están desenvolvendo no marco do Plan MEGA, de Mellora Educativa de Galicia. Esta estratexia da Xunta ten entre os seus obxectivos incrementar o nivel das competencias clave do alumnado, personalizar o apoio educativo e a atención ás necesidades específicas e avanzar nun modelo de ensino inclusivo.