A Xunta lembra que segue aberto o prazo das axudas do 0,7 % do IRPF para entidades do Terceiro Sector
A Xunta de Galicia lembra que está aberto ata o vindeiro mércores 30 de xullo o prazo para solicitar as axudas destinadas á realización de programas con fins sociais por parte de entidades do Terceiro Sector. A convocatoria conta cun orzamento inicial de 33,2 millóns de euros, con cargo á asignación tributaria do 0,7 % do Imposto sobre a Renda das Persoas Físicas (IRPF) e do Imposto de Sociedades.
O Goberno galego prevé que, unha vez o Estado formalice a cantidade definitiva que lle corresponde a Galicia, a dotación total desta orde de achegas —xestionada pola Consellería de Política Social e Igualdade— ascenda ata os 35,5 millóns de euros. Esta cifra supón un incremento do 7 % respecto da convocatoria do ano pasado.
As axudas van dirixidas a entidades que traballan nos eidos das políticas sociais e da igualdade, desenvolvendo programas de protección á infancia, atención a persoas maiores ou con discapacidade, inclusión social, promoción da igualdade ou loita contra a violencia de xénero. Tamén se inclúen investimentos para equipación, adaptación ou rehabilitación de centros e adquisición de vehículos.
Na anterior convocatoria, financiáronse 744 programas promovidos por 155 entidades, o que supón 48 iniciativas e 8 entidades máis ca en 2023. Dende a primeira edición destas achegas en 2017, na que se apoiaron 201 programas de 55 entidades, a tendencia foi de crecemento continuo.