A Xunta participa en Expobusiness Compostela para conectar empresas con persoas en busca de emprego
A Xunta de Galicia participa esta fin de semana na feira Expobusiness Compostela, un evento que conecta empresas de todos os sectores con persoas en procura de emprego ou dunha mellora na súa traxectoria profesional.
O secretario xeral de Emprego e Relacións Laborais, Pablo Fernández, visitou hoxe o expositor da Xunta na feira, así como os das distintas compañías presentes nesta cita celebrada na Alameda compostelá. O evento reúne iniciativas empresariais emerxentes e consolidadas, que aproveitan para dar a coñecer os seus proxectos ao público asistente.
Ademais do foro de emprego, Expobusiness Compostela inclúe mesas redondas e charlas con líderes empresariais e profesionais, centradas nos retos da innovación, a dixitalización e o futuro do tecido empresarial galego.
Esta iniciativa forma parte do programa Santiago en Vivo, que se celebra esta fin de semana na cidade e que inclúe tamén Compos(tech)la, un espazo onde se ofrecen demostracións en directo de avances tecnolóxicos e innovadores como robots, aplicacións de intelixencia artificial ou videoxogos.