A Xunta renova con Abanca e Caixa Rural as liñas de avais á compra de vivenda para o 2025
A conselleira de Vivenda e Planificación de Infraestruturas, María M. Allegue, asinou hoxe coa representación de Abanca e Caixa Rural a renovación do convenio que regula as liñas de avais á compra de vivenda para este 2025. O obxectivo desta iniciativa é facilitar o acceso á vivenda habitual, especialmente aos menores de 36 anos e agora tamén, sen límite de idade, para aquelas persoas que adquiran vivendas protexidas.
O importe do aval poderá chegar ata o 20% do prezo da vivenda, permitindo cubrir hipotecas que representen entre o 80% e o 100% do custo total do inmoble. A convocatoria está xa publicada no Diario Oficial de Galicia, e as solicitudes poderán presentarse desde o 1 de abril ata o 31 de outubro de 2025, ou ata esgotar o importe previsto para esta anualidade.