Deportes | Actualidade

Caballero defende Vigo como sede do Mundial 2030 e esixe á Federación que rectifique o “roubo político” que deixou á cidade fóra. O Pleno pide publicar os criterios de selección e o cesamento de Diego Calvo.

O alcalde de Vigo, Abel Caballero, interveu no Pleno municipal para defender o dereito da cidade a recuperar a súa condición de sede do Mundial de Fútbol 2030. Denunciou que a retirada de Vigo da listaxe inicial de candidaturas foi un “roubo político” e un “escándalo”, esixindo á Federación Española de Fútbol que rectifique. A proposta socialista foi aprobada co apoio do goberno local e a abstención do PP e BNG.

Caballero acusou directamente ao actual presidente da RFEF, Rafael Louzán, de mentir sobre o proceso de selección e criticou a falta de apoio da Xunta e da Deputación para o financiamento da reforma de Balaídos. Subliñou que o Concello está disposto a asumir a obra en solitario se é necesario. Ademais, instou a publicar os criterios de puntuación e pediu o cesamento do conselleiro Diego Calvo.